Macron në forumin e Davosit: Rusia nuk duhet ta fitojë luftën në Ukrainë

Presidenti francez Emmanuel Macron tha sot në Davos se Rusia nuk duhet të lejohet të fitojë luftën në Ukrainë.

Për këtë arsye, ai theksoi se evropianët duhet të rinovojnë përpjekjet e tyre për të ndihmuar Kievin këtë vit, pavarësisht nga rezultati i zgjedhjeve presidenciale amerikane.

Nga ana e tij, presidenti ukrainas Volodymyr Zelensky e quajti homologun e tij rus Vladimir Putin një “grabitqar” që nuk do të kënaqet nga një konflikt “i ngrirë” në Ukrainë, ndërsa i kërkoi Perëndimit armë dhe investime për vendin e tij.

“Pas vitit 2014 pati përpjekje për të ngrirë luftën në Donbass (në Ukrainën lindore). Kishte garantues shumë me ndikim, si kancelarja e Gjermanisë (Angela Merkel), presidenti i Francës (Francois Hollande). Por Putini është një grabitqar që nuk është i kënaqur me produktet e ngrira”, tha Zelensky dje në fjalimin e tij në Forumin Ekonomik Botëror në Davos.

Zelensky gjithashtu akuzoi Putinin për përpjekje për të normalizuar zhvendosjet masive, fshatra dhe qytete të rrafshuara dhe ndjenjën e tmerrshme se lufta mund të mos përfundojë kurrë. /vizionplus.tv